पंचवटी कारंजा परिसरातील गुरूदत्त शैक्षणिक मंडळाने रस्त्यावर मंडप उभारल्याने वाहने वळविण्यास अडचणी येत आहेत.
गणेशोत्सवास अवघे काही दिवस बाकी राहिल्याने सार्वजनिक मंडळांकडून युध्द पातळीवर मंडप उभारणी करण्यात येत आहे. अनेक मंडप चौफुली किंवा रस्त्यांवरच उभारण्यात येत असल्याने वाहतुकीला आतापासूनच अडथळा होऊ लागला आहे. त्यामुळे गणेशोत्सवात वाहतुकीचे नियोजन करताना पोलिसांची दमछाक होणार आहे.
शहरातील बहुसंख्य सार्वजनिक गणेश मंडळे ही राजकीय पक्षांशी संबंधित पदाधिकाऱ्यांच्या वर्चस्वाखालीला आहेत. गणेशोत्सव सुरू होण्याआधीच काही मंडळांनी महापालिका, महावितरण, वाहतूक पोलीस आदी विभागाच्या परवानग्या मिळवल्या आहेत. संबंधित विभागाकडून कार्यालयातील गर्दी कमी करण्यासाठी परवानगी देण्याचे काम ऑनलाईन सुरू केल्याने मंडळांकडून कुठल्या ठिकाणी मंडप उभारला जात आहे, प्रशासनाने दिलेले निकषाचे पालन केले की नाही, याची तपासणी होत नाही, केवळ अर्जावर आभासी पध्दतीने परवानग्या दिल्या जात आहेत. राजकीय वरदहस्त सार्वजनिक गणेश मंडळांवर असल्याने प्रशासनाकडूनही अधिक ताणून धरले जात नाही. गणरायाच्या स्वागताचे, कार्यकारिणीचे असे वेगवेगळे फलक ठिकठिकाणी उभारले जात आहेत.
पंचवटी कारंजा परिसरातील गुरूदत्त शैक्षणिक मंडळाने रस्त्यावर मंडप उभारल्याने वाहने वळविण्यास अडचणी येत आहेत. अशोक स्तंभावरील शिवसत्य मंडळाचा अशोकस्तंभ मानाचा राजा , गाडगे महाराज चौकातील शिवसेवा युवक मंडळ, खुटवड नगर येथील शिवसेना शिंदे गट महिला संपर्कप्रमुख सुवर्णा मटाले यांनी आयटीआय-आम्रपाली लिंक रोडवर उभारलेला मंडप, ही केवळ प्रानिनिधिक उदाहणे असून शहरात अनेक मंडळांनी असेच रस्त्यावर अतिक्रमण केल्याची स्थिती आहे. संध्याकाळी गणपती देखावे पाहण्यासाठी लोक गर्दी करतात. त्यामुळे रस्ता बंद होतो. दिवसा या मंडपामुळे मुख्य रस्त्याला वळसा घालत किंवा मंडपाचे अतिक्रमण चुकवत मार्गक्रमण करावे लागते. यावर प्रशासनाचा कोणताच अंकुश दिसत नाही.
याविषयी पंचवटी विभागीय अधिकारी मदन हरिश्चंद्र यांनी, गणेश मंडळांना ऑनलाईन पध्दतीने परवानगी दिली जात असून जिल्हाधिकारी कार्यालयाकडून निकषांची पाहणी करण्यासाठी पथके तैनात करण्यात आली आहेत, त्यांच्याकडून पाहणी केली जात असल्याचे सांगितले.
मनपाला कारवाईचे अधिकार
सार्वजनिक गणेश मंडळांकडून महानगरपालिका, महावितरण यांच्याकडून परवानगी मिळाल्यानंतर पोलीस विभागाकडे परवानगी मागितली जाते. अन्य विभागांची परवानगी असल्याने पोलीस विभागाकडूनही परवानगी दिली जाते. काही मंडळांच्या मंडपांमुळे वाहतुकीला अडथळा निर्माण होतो. परंतु, त्यावर कारवाई करण्याचे अधिकार महानगरपालिकेला आहेत. – संदीप मिटके (सहायक पोलीस उपायुक्त)
रस्ते अडविणे अयोग्य
सार्वजनिक मंडळांना परवानगी मिळाली असली तरी जुनी मंडळे ज्या ठिकाणी मंडप उभारतात, त्याच ठिकाणी मंडप उभारावेत. नव्या मंडळांनी कुठेही रस्ता अडवून अतिक्रमण करू नये. – गजानन शेलार (पदाधिकारी, सार्वजनिक गणेश मंडळ समिती)
कारवाई करणार
रस्त्याच्या मधोमध नवीन गणेश मंडळांना मंडप उभारणीसाठी परवानगी नाही. रस्त्यात मंडप उभारणी करत असतील तर आम्ही कारवाई करू. – अशोक करंजकर ( आयुक्त, महापालिका)