अभिमानास्पद! अमेरिकेतील सहावीच्या अभ्यासक्रमात ‘या’ भारतीयाच्या जीवनावर आधारित धडा

आसामच्या मुख्यमंत्र्यांनाही केलं कौतुक

एका माणसामुळे फरक पडू शकतो का?, असा प्रश्न विचारल्यास त्याचं उत्तर होय असं देता येईल आणि उदाहरण दाखवायचं झाल्यास जादव पायेंग यांच नाव घेता येईल. भारताचे वनपुरुष म्हणजेच ‘फॉरेस्ट मॅन ऑफ इंडिया’ म्हणून लोकप्रिय असणाऱ्या जादव यांनी एकट्याने संपूर्ण जंगल उभारलं आहे असं सांगितल्यास तुम्हाला आश्चर्य वाटेल. पायेंग यांच्या या कामाची दखल आता थेट पाश्चिमात्य देशांकडून घेण्यात येत आहे. नुकताच अमेरिकेतील एका अभ्यासक्रमामध्ये पायेंग यांच्या कार्याबद्दल माहिती देणाऱ्या एका धड्याचा समावेश करण्यात आला आहे. कनेक्टीकटमधील ब्रिस्टोल येथील ग्रीन हिल्स स्कूलने सहावीच्या अभ्यासक्रमामध्ये पायेंग यांच्या कामासंदर्भातील धड्याचा समावेश केला आहे. इकोलॉजी म्हणजेच पर्यावरणशास्त्रामध्ये या धड्याचा समावेश करण्यात आला आहे. आता येथील मुलं पद्मश्री पुरस्कारप्राप्त पायेंग यांच्या कार्याबद्दल शिकणार आहेत.

ग्रीन हिल्स स्कूलमध्ये शिकवणाऱ्या नवामी सारमा यांनी न्यूज १८ शी बोलताना, “येथे प्रत्येक जिल्ह्यातील शाळांसाठी शिक्षण क्षेत्रातील तज्ज्ञ मंडळी अभ्यासक्रम तयार करतात. पायेंग यांच्यासंदर्भातील धडा अशाच एका अभ्यासक्रमाच्या माध्यमातून घेण्यात आला आहे,” असं सांगितलं. सारमा स्वत: आसाममधील असून ते अमेरिकेमध्ये शिक्षक आहेत.

जगभरामध्ये पर्यावरणासंदर्भात अनेक गोष्टी घडत असतानाच वातावरणातील बदलांसंदर्भात चिंता व्यक्त केली जात आहे. पर्यावरणाबद्दल संवेदनशील राहण्यासंदर्भात लहान मुलांना शालेय वयामध्येच शिक्षण देण्याच्या उद्देशाने जगभरामध्ये प्रयत्न सुरु आहेत. अशा मुलांसमोर वयाच्या १६ वर्षापासूनच पर्यावरण संरक्षणाचे काम करणाऱ्या पायेंग यांच्यापेक्षा अधिक चांगले उदाहरण कोणाचे असू शकते. पायेंग यांच्या कार्याने मुलांनाही प्रेरणा मिळेल या उद्देशाने त्यांच्या आयुष्यावरील धड्याचा अभ्यासक्रमामध्ये समावेश करण्यात आला आहे.

शनिवारी पायेंग यांचे गृहराज्य असणाऱ्या आसामचे मुख्यमंत्री सर्बानंद सोनोवाल यांनी पायेंग यांचं ट्विटरवरुन अभिनंदन केलं आहे. पर्यावरणासंदर्भात त्यांनी हाती घेतलेलं काम आणि केलेल्या अथक प्रयत्नांसाठी सोनोवाल यांनी पायेंग यांचं अभिनंदन केलं आहे.जादव यांनी एकट्याने उभ्या केलेल्या जंगलाला मोलाईचे जंगल असं म्हणतात. या जंगलाचा आकार न्यू यॉर्कमधील सेंट्रल पार्कपेक्षाही मोठा आहे. हे जंगला आता बंगाल टायगर, भारतीय गेंडे, वेगवेगळ्या प्रकारचे सरपटणारे प्राणी आणि १०० हून अधिक प्रजातीची हरणं आणि ससे यांचा अधिवास आहे.