फिल्म अँड टेलिव्हिजन इन्स्टिट्यूट ऑफ इंडियाच्या (एफटीआयआय) अध्यक्षपदी अभिनेते, दिग्दर्शक आणि निर्माते शेखर कपूर यांची मंगळवारी नियुक्ती झाली. केंद्र सरकारच्या माहिती आणि प्रसारण विभागाने कपूर यांच्या नियुक्तीची घोषणा केली असून, तीन मार्च २०२३ पर्यंत ते ‘एफटीआयआय’चे अध्यक्ष असतील.
‘एफटीआयआय’चे अध्यक्ष म्हणून निर्माते बी. पी. सिंह यांची मुदत ३ मार्च रोजी संपल्यानंतर करोनाकाळात नियुक्ती प्रक्रिया टाळण्यासाठी सिंह यांच्या नियुक्तीला दोनदा मुदतवाढ देण्यात आली. अखेर, मंगळवारी पूर्ण वेळ अध्यक्षपदासाठी कपूर यांची नियुक्ती करण्यात आली. कपूर यांच्या नियुक्तीनंतर आता केंद्र सरकारतर्फे ‘एफटीआयआय’चे सोसायटी सदस्य म्हणून कला क्षेत्रातील व्यक्तींची निवड केली जाईल. सोसायटी स्थापनेनंतर त्यातून नियामक मंडळ आकारास येईल.
अभिनेते गजेंद्र चौहान यांची नियुक्ती केल्यापासून ‘एफटीआयआय’चे अध्यक्षपद चर्चेत आहे. चौहान यांचा कार्यकाळ संपल्यानंतर हरहुन्नरी अभिनेते अनुपम खेर यांची अध्यक्षपदी नियुक्ती करण्यात आली. खेर यांच्या नियुक्तीने विरोध थांबला. खेर यांनी ऑक्टोबर २०१८ मध्ये तडकाफडकी राजीनामा दिल्यानंतर ‘सीआयडी’ मालिकेचे दिग्दर्शक व निर्माते; तसेच ‘एफटीआयआय’चे पदाधिकारी ब्रिजेंद्र पाल सिंह (बी. पी. सिंह) यांची डिसेंबर २०१८ मध्ये अध्यक्षपदी नियुक्ती करण्यात आली. सिंह यांच्या कार्यकाळात ‘एफटीआयआय’ने ठिकठिकाणी लघुअभ्यासक्रम सुरू केल्याने खासगीकरणाच्या चर्चेने जोर धरला होता. शुल्कवाढ; तसेच लघुअभ्यासक्रमांसाठी हजारो रुपये आकारण्यावरून टीका होत होती. सिंह यांचा कार्यकाळ पूर्ण झाल्यानंतर अध्यक्षपदी कोणाची नियुक्ती होणार, याची उत्सुकता होती.