उच्चांकी दर मिळाळेल्या लसणाच्या दरात निम्म्याने घट झाली आहे. नवीन लसणाचा हंगाम सुरू झाला असून, मध्यप्रदेशातून लसणाची आवक वाढली आहे.
पुणे : उच्चांकी दर मिळाळेल्या लसणाच्या दरात निम्म्याने घट झाली आहे. नवीन लसणाचा हंगाम सुरू झाला असून, मध्यप्रदेशातून लसणाची आवक वाढली आहे. पंधरा दिवसांपूर्वी एक किलो लसणाचे दर ४०० रुपये किलोपर्यंत होते. नवीन लसणाची आवक सुरू झाल्यानंतर दरात घसरण झाली आहे.
किरकोळ बाजारात एक किलो लसणाला प्रतवारीनुसार २०० ते २५० रुपये दर मिळाले आहेत. किरकोळ बाजारात एक किलो लसणाचे दर ४०० रुपये किलो होते. लसूण दरातील तेजीची झळ गृहिणींना सोसावी लागत होती. पाव किलो लसणाचे दर १०० रुपयांपर्यंत होते. नवीन हंगाम सुरू झाल्यानंतर बाजारात दररोज २० ते ३० टन लसणाची आवक होत आहे.
परराज्यातील लसणावर भिस्त
महाराष्ट्रात गावरान लसणाची लागवड कमी होत असल्याने परराज्यातील लसणाला मागणी वाढली आहे. मध्यप्रदेश, राजस्थान, गुजरातमध्ये लसणाची लागवड मोठ्या प्रमाणावर होते.
लसणाच्या दरात आणखी घट
लसणाचा नवीन हंगाम सुरू झाला असून, मध्यप्रदेशातील लसणाची आवक वाढली आहे. थंडी ओसरल्यानंतर परराज्यातील लसणाचा हंगाम सुरू होतो. पुढील तीन ते चार महिने लसणाची मोठी आवक होणार आहे. दरात आणखी घट होणार आहे.- विलास भुजबळ, ज्येष्ठ अडते, श्री छत्रपती शिवाजी मार्केट यार्ड
लसणाचे दर
● घाऊक बाजारात दहा किलोचे दर- १००० ते १६०० रुपये
● किरकोळ बाजारात एक किलोचे दर – २०० ते २५० रुपये